Kerfisstjóri

Hafnarfjarðarbær óskar eftir að ráða reyndan og skipulagðan einstakling í starf kerfisstjóra í þróunar- og tölvudeild

Hafnarfjarðarbær hefur verið leiðandi sveitarfélag við innleiðingu á stafrænum og tæknilegum lausnum og vill vera þar í fararbroddi. Þróunar- og tölvudeild fer með stjórnun og stefnumótun í tölvumálum bæjarins og tengdra stofnana, ásamt því að sjá um samhæfingu og eftirlit. Deildin sér um rekstur allra tölvukerfa og tryggir að meðhöndlun kerfa og gagna sé í samræmi við þarfir bæjarins og öryggiskröfur.

Kerfisstjóri tekur virkan þátt í rekstri og þróun tækniumhverfis bæjarins, veitir samstarfsfólki tæknilega leiðsögn og vinnur náið með ytri sérfræðingum. Starfið heyrir undir deildarstjóra þróunar- og tölvudeildar.

Við leitum að einstaklingi sem hefur mikla reynslu af Microsoft -umhverfi, skýjaþjónustum og nútímalegum rekstri upplýsingatækni, nýtur þess að leysa flókin tæknimál og getur forgangsraðað fjölbreyttum verkefnum þar sem öryggi, sjálfvirkni og góð notendaþjónusta fara saman. 

Helstu verkefni og ábyrgð: 

• Kerfisstjórnun í Microsoft 365, Azure, Entra ID, Active Directory og Intune
• Aðgangsstýring, tækjastýring og eftirfylgni með tæknilegum öryggisráðstöfunum
• Uppsetning og rekstur kerfa á netþjónum í Azure og hjá hýsingaraðila, í samstarfi við ytri þjónustuaðila
• Þátttaka í netrekstri, bilanagreiningu og breytingum með netráðgjafa bæjarins
• Vinnur að fyrirbyggjandi öryggisráðstöfunum, öruggum kerfisstillingum og úrbótum vegna veikleika
• Úrlausn flókinna þjónustubeiðna, tæknilegur stuðningur við samstarfsfólk og notendaþjónusta eftir þörfum
• Önnur verkefni samkvæmt starfslýsingu

Menntunar- og hæfniskröfur: 

• Menntun í kerfisstjórnun, tölvunarfræði, hugbúnaðarverkfræði, tölvuverkfræði eða sambærilegri grein sem nýtist í starfi
• Viðeigandi fagvottanir á sviði Microsoft -skýjaþjónustu, kerfisstjórnunar, aðgangsstýringar eða netrekstrar
• Að lágmarki fimm ára reynsla af kerfisstjórnun í Microsoft 365, Entra ID og Active Directory, auk góðrar þekkingar á Azure, Intune, auðkenningu, réttindastýringu og tækjarekstri
• Reynsla af sjálfstæðri úrlausn flókinna mála, tæknilegri leiðsögn og samstarfi við þjónustuaðila
• Geta til að bregðast við breytingum og aðlagast breyttum aðstæðum, auk þess að nýta tækniframfarir til að bæta rekstur og þjónustu
• Reynsla af umbótavinnu, einföldun ferla eða sjálfvirkni í rekstri upplýsingatækni er kostur
• Mikil skipulagshæfni, sjálfstæði og geta til að forgangsraða og fylgja verkefnum eftir
• Þjónustulund, góð samskiptahæfni og vilji til að miðla þekkingu
• Góð íslenskukunnátta og færni í ensku til tæknilegra samskipta og upplýsingaöflunar

Nánari upplýsingar veitir Eymundur Björnsson, deildarstjóri þróunar- og tölvudeildar, [email protected] og Thelma Kristín Kvaran, [email protected].

Umsóknarfrestur er til og með 22. október 2026.

Umsókn þarf að fylgja starfsferilskrá og kynningarbréf þar sem gerð er grein fyrir ástæðu umsóknar og hæfni umsækjanda sem nýtist í starfi. Umsóknir gilda í sex mánuði frá dagsetningu auglýsingar.

Launakjör eru samkvæmt kjarasamningi Sambands íslenskra sveitarfélaga við viðkomandi stéttarfélag.

Vakin er athygli á stefnu Hafnarfjarðarbæjar að jafna hlutfall kynjanna í störfum hjá bænum og að vinnustaðir bæjarins endurspegli fjölbreytileika samfélagsins.